Sunday, May 10, 2015

விதி வரைந்த பாதை சிறுகதைத் தொகுதி பற்றிய இரசனைக் குறிப்பு

விதி வரைந்த பாதை சிறுகதைத் தொகுதி பற்றிய இரசனைக் குறிப்பு

இலக்கியம் என்பது காலத்தின் கண்ணாடியாகும். இலக்கியத்தை நேசிக்கத் தெரிந்தவர்கள் ஒரு சமுதாயத்தின் சுவடுகளை நமக்குள் பதித்துவிடுகின்றார்கள். பல்வேறு இலக்கிய வடிவங்களும் அகவயம் அல்லது புறவயம் சார்ந்த விடயங்களை வெளிப்படுத்த முனைகின்றபோது அது எமது சிந்தனைகளில் தாக்கம் செலுத்துகின்றது.

இன்று இலக்கிய வடிவங்கள் பல்வேறு வகையிலும் பலராலும் உள்வாங்கப்பட்டுள்ளது. கவிதைகள், சிறுகதைகள் போன்றன மனதில் உள்ள விடயங்களை அல்லது சமுதாயத்தில் புரையோடிப்போன விடயங்களைச் சொல்ல விளைகின்றன.

இந்த வகையில் இளம் எழுத்தாளர் ஹனீபா சஹீலாவும் நம்முன்னே கதாசிரியராக உருவெடுத்திருக்கின்றார். பாடசாலை ஆசிரியராக கடமையாற்றும் இவர், தான் எழுதிய பத்து சிறுகதைகளை ஒன்றிணைத்து விதி வரைந்த பாதையி

லே என்ற சிறுகதைத் தொகுதியை வெளியிட்டிருக்கின்றார்.

விதி வரைந்த பாதை என்ற என்ற முதல் கதையானது காதலின் வலிகளை வார்த்தை வழியே சொல்லியிருக்கின்றது. இன்றைய காலத்தில் அந்த உணர்வுகள் பலராலும் தவறாக விளங்கப்பட்டிருக்கின்றது. புனிதமான விடயங்கள் இன்று வெறும் பித்தலாட்டங்களாக இருக்கின்றன. சுமையா என்ற கதாபாத்திரத்தை வைத்து பின்னப்பட்ட சிறுகதையும் அத்தகையதொரு காதலைத்தான் நமக்குச் சொல்கின்றது. கைவிட்டுப்போன காதலை நண்பர்கள் மூலமாக தேடும் சுமையா இறுதியில் ஒரு வைத்தியருக்கு சந்தர்ப்பவசத்தால் மனைவியாகிவிடுகின்றாள். தன்னைக் காதலித்து ஏமாற்றிய நிசார் என்பவனின் நினைவுகளை அவள் அழித்தொழித்துவிட்டு நிம்மதியாக வாழ்ந்தாள். அக்காலத்தில் அவன் தான் செய்த திருட்டுக் குற்றத்தால் கைதாகி, பின்னர் சிறையிலிருந்து விடுதலைப் பெற்று எதிர்பாராத விதமாக விபத்துக்குள்ளாகின்றான். விதி வரைந்த பாதையில் பயணித்த அவன் சுமையாவின் கணவரிடமே சிகிச்சைக்கு வருகின்றான். அங்கே சுமையாவைக் கண்ட அவன் தனது தவறுகளை உணர்ந்து, யாரிடமும் சொல்லாமலேயே அங்கிருந்து சென்றுவிடுகின்றான். எனவே அவனது பாதை இனி விதி வரைந்த படியே இருக்கும் என்பதை இந்தக் கதை அழகாக எடுத்துக் காட்டியிருக்கின்றது.

பாவம் இந்தப் பாவை என்ற என்ற கதை ஹஸ்னாவின் சோகங்களை சொல்லில் வடித்திருக்கின்றது. தனது வறுமை நிலமை காரணமாக வெளிநாட்டுக்குப் பயணமாகும் கதைக் கருவை பின்புலமாகக் கொண்டு எழுதப்பட்டிருக்கின்றது. பெண்களும் வெளிநாட்டுப் பயணமும் என்ற தொனிப்பொருளில் பல கருத்துக்களை முன்வைக்க முடியும் என்ற போதிலும், பொதுவாக எல்லோரது அபிப்பிராயமும் வெளிநாட்டுப் பயணம் பெண்களை சீரழிக்கும் என்பதாகும். பெண்களை மாத்திரமின்றி குடும்பத்தை, கணவனை, பிள்ளைகளை என எல்லாவற்றையுமே சர்வ நாசமாக்கிவிடும். அண்மையில் சவூதியில் மரண தண்டனை பெற்ற ரிஸானா நபீக் என்ற பெண்ணை இவ்வுலகம் எளிதில் மறந்துவிடாது. வாதப் பிரதிவாதங்கள் பலதாக இருந்தபோதிலும் அடிப்படை அவள் வெளிநாட்டுக்கு சென்றமைதான். குடிசை வீட்டை, மாடி வீடு ஆக்குவதற்காக தனது தலையை அடகு வைத்த அந்த கொடூர சம்பவம் நம் இதயத்தில் எல்லாம் இரத்தக் கண்ணீர் பாய்ச்ச வைத்தது. கதாசிரியர் ஹனீபா சஹீலா எழுதியிருக்கும் ஹஸ்னாவின் கதையில், அவள் தன் கனவுகளை சுமந்து வெளிநாடு சென்று உழைத்து வருகையில், தன் குடும்பமே சுனாமிக்கு இரையாகிவிட்டதை அறிந்து கதறுகிறாள். கண்ணீர் வடிக்கிறாள். இறுதியில்... தனது குடும்பம் தன்னுடன் இருப்பதான ஒரு கற்பனையில் பைத்தியமாகி விடுவதாக கதை நிறைவு செய்யப்பட்டுள்ளது. கீழுள்ள வரிகள் எத்தனை உருக்கமானது என்பதை பாருங்கள்.

`ஆத்மா அடங்கிவிட்ட உடல்கள் அடக்கம் செய்யப்பட்டன. ஹஸ்னா தனது தங்கை ஹனீனாவுக்காக கொண்டு வந்த அந்த பொம்மையை அணைத்து முத்தமிட்டாள். நாட்கள் நகர்கையில் அந்த பொம்மை, தங்கை ஹனீனாவாக மாறியது. தனிமையில் இருந்துகொண்டு அதை முத்தமிடுவதும் உரையாடி விளையாடுவதும் வழக்கமாகியது.'

கறுப்பு ஜூன் என்ற கதை ஒரு உண்மைக் காதலை காட்சிப்படுத்தியிருக்கின்றது. கௌதம் என்பவன் தனது காதல் பற்றி சிந்து என்ற பெண்ணிடம் சொல்வதாக கதை நகர்த்தப்பட்டிருக்கின்றது. காதலித்தபோது தாம் எப்படி உண்மையாக இருந்தோம் என்பதை அவன் சொல்கையில் இன்றைய காலத்திலும் இவ்வாறு காதல்கள் இருக்கின்றனவா என்று எண்ணத் தோன்றுகின்றது.

மனதைத் திறந்த மடல் என்ற கதை, சமூகத்தின் இருப்பு நிலையை எடுத்து விளக்குகின்றது. மணமுடிக்கும் பெண், சீதனம் என்ற பெயரில் எவ்வளவு மனத் தாக்கங்களுக்கு ஆளாகின்றாள் என்பதையோ, மனதால் இணைந்த இருவரைக்கூட சீதனம் என்ற பெயரால் பிரிப்பது தவறு என்பதையோ பலர் புரிந்துகொள்வதில்லை. இக்கதையில் வரும் சாஹிர் தன் குடும்ப நிலை அறிந்து வெளிநாட்டுக்கு உழைக்கச் செல்கின்றான். விடுமுறையில் வந்திருக்கும்போது தனது மைத்துனியான ரிபாவைக் கண்டு காதல் கொள்கின்றான். அவளும் சம்மதிக்கிறாள். தங்கைகள் மூவரின் திருமணத்தை நடத்திவிட்டுத்தான் ரிபாவை மணமுடிப்பதாக தாயாரிடம் தெரிவிக்கையிலேயே பூகம்பம் வெடிக்கின்றது.

ஷஅவளைக் கல்யாணம் பண்ணிக்கிட்டா அந்த வீட்ல போய் நீயும் கஷ்டப்படுவ. உனக்கு பெரிய இடமா நான் பார்க்கிறேன். இந்தக் கதய இத்தோடு மறந்திடு. என்ன மீறி அவளக் கல்யாணம் பண்ணிக்கிட்டா என்ட மௌத்துக்கும் என் முகத்துல முழிக்காத| என்று தாயார் கூறுகிறார். தாயின் வார்த்தையை மீறவும் முடியாமல், காதலை மறக்கவும் முடியாமல் இறுதியில் நிரந்தரமாகவே வெளிநாட்டுக்குச் சென்றுவிடுகிறான் சாஹிர்.
எத்தனையோ ஆண்கள் இன்று இந்தக் கொடுமையை அனுபவிக்கின்றார்கள். மாமி மருமகள் சண்டைகளின்போது இருதலைக்கொள்ளி எறும்புகளாக இருக்கின்றார்கள். பெற்று வளர்த்த தாயா? நம்பி வந்த மனைவியா? என்கிறபோது யார் பக்கம் தவறிருந்தாலும் சமாதானமாக்க ஆண் படும்பாடு சொல்லிமாளாது. மகன் மாறிவிட்டான் என்று தாய் பதறுவாள். கணவன் சரியில்லை என்று மனைவி கதறுவாள். இறுதியில் வாழ்க்கையே சிதறும் அவனுக்கு. இவ்வாறான இக்கட்டுகள் நேர்கையில் ஆண்கள் எடுக்கும் முடிவு யாரும் வேண்டாம் என்றுவிட்டு எங்காவது சென்றுவிடுவதுதான் என்பதை இந்தக் கதையும் உணர்த்துகிறது.

கதாசிரியர் ஹனீபா சஹீலாவுக்கு கதையை லாவகமாக நகர்த்திச் செல்லும் திறன் நிறையவே இருக்கின்றது. தான் பார்த்த அல்லது கேட்ட விடயத்தை கதையாக்கிவிடும் நுணுக்கம் தெரிந்திருக்கின்றது. ஆழ்ந்த வாசிப்பின் மூலம் அவர் இன்னமும் தன் திறமையை வளர்த்துக்கொள்ளலாம். இலக்கிய ரசிகர்கள் இந்தத் தொகுதியை வாங்கி வாசிக்க வேண்டும். அவரது முயற்சிகளுக்கு கைகொடுக்க வேண்டும். கதாசிரியர் ஹனீபா சஹீலா, நிறைய சமூக அவலங்களை சிறுகதையாக வெளிக்கொணர வேண்டும் என்று அவரை வாழ்த்துகிறேன்!!!

நூலின் பெயர் - விதி வரைந்த பாதை
நூல் வகை - சிறுகதை
நூலாசிரியர் - ஹனீபா சஹீலா
விலை - 200 ரூபாய்

Monday, September 16, 2013

தாலாட்டுப் பாடல்கள் தொகுதி பற்றிய இரசனைக் குறிப்பு


தாலாட்டுப் பாடல்கள் தொகுதி பற்றிய இரசனைக் குறிப்பு

நீண்ட இடைவெளிக்குப் பின் ஏப்ரல் 2011 இல் எழுதத் தொடங்கிய கிண்ணியா பி.ரி. அஸீஸ் அவர்கள் டிசம்பர் 2011 வரையான ஒன்பது மாதங்களுக்குள் ஒன்பது படைப்புக்களை வெளியிட்டவர். தாலாட்டுப் பாடல்கள் என்ற தொகுதி தாயன்பின் வெளிப்பாடான தாலாட்டுக்களால் அலங்கரிக்கப்பட்டுள்ளது. பாத்திமா ருஸ்தா பதிப்பகத்தால் வெளியிடப்பட்டுள்ள இந்த நூல் 19 பக்கங்களில் கைக்கு அடக்கமான நூலாக காணப்படுகின்றது.

2012 இல் சாமஸ்ரீ தேசகீர்த்தி பட்டம் வழங்கி கௌரவிக்கப்பட்டுள்ள கிண்ணியா பி.ரி. அஸீஸ் அவர்கள்; தனது இளம் காலத்தில் கிண்ணியாச் செல்வன் என்ற புனைப் பெயரில் தனது படைப்புக்களைத் தந்தவர். பல்வேறு ஆளுமைகளைக் கொண்டிருக்கும் இவர், ஒரு தாய் தன் பிள்ளைகளைத் தாலாட்டும் பாடல்களாக தனது தொகுதியை வெளியிட்டிருப்பது சிறப்பம்சமாகும்.

இத்தொகுதியை வெளியிட்ட பதிப்பகத்தார் 'இனிய ராகம், சுவை நயம் மற்றும் கருத்தாழமிக்க இவை தாயன்பில் ஒரு இன்ப அதிர்வை ஏற்படுத்தும். பிஞ்சு மனங்களில் பூரிப்பையும் கொண்டு வரும்' என்கின்றனர்.


கிராமிய மணம் கமழும் இந்தப் பாடல்கள் குழந்தைகளை ஆசிர்வதிப்பதாகவும், நற்செயல்களை விதைக்க கற்றுக் கொடுப்பதாகவும் அமைந்திருக்கின்றன.

சில குழந்தைகள் எந்நேரமும் அழுத வண்ணமே இருப்பார்கள். பால் குடிக்கவும் மாட்டார்கள். தூங்கவும் மாட்டார்கள். அதை மையப்படுத்தி முதல் பாடலான (பக்கம் 01) தாலாட்டு இப்படி தொடங்கியிருக்கிறது.

தாலாட்டுது உன்னை
தாலாட்டுது
அமுதூட்டும் கை உன்னை
தாலாட்டுது

உறக்கமின்றி
அழுது நீயும் அடம்பிடிக்காதே!
இரக்கமின்றி தொல்லை எனக்கு
தந்து நில்லாதே!

இரக்கத்தோடு உறங்கிடுவாய் (பக்கம் 02) என்ற பாடல் அழகிய உவமானங்களைக் கொண்டுள்ளது. வாசிப்பதற்கு இனிமையாக காணப்படுகின்றது. கண்ணுறங்கும் நேரத்தில் களிப்பாக தூங்குவதற்காக ஒரு தாய் தன் செல்லக் குழந்தைக்கு பாடும் தாலாட்டு இது..

பாசமுள்ள பைங்கிளியே
பாடிவரும் வெண்புறாவே
ஆசை கொண்ட அருந்தவமே
என்னருகில் கண் துயில்வாய்!

மனங் கவர்ந்த மாங்கனியே
மகிழ்வு தரும் பூ மணியே
இணங்கி வந்த தாய் மடியில்
இரக்கத்தோடு உறங்கிடுவாய்!

பாசம் பொங்குது என்ற பாடல் (பக்கம் 05) வரிகள் ஓசை நயத்துடன் காணப்படுகின்றது. வாசிக்க இனிமை தரும் இந்த வரிகள் குழந்தையின் குறும்புத் தனத்தை ஞாபகப்படுத்துகின்றது.

தாலாட்டும் பிள்ளை ஒன்று
தாயின் முகம் பார்க்குது!
பாலூட்டு என்று சொல்லி
பாசம் பொங்க கேட்குது!

அன்னை மடி மீதினிலே
அன்பொழுக இருக்குது
கண்ணை மூடி துயில் கொண்டு
கலக்கமின்றி உறங்குது!

சுகம் காண தூங்கிடடி என்ற தாலாட்டுப் பாடல் (பக்கம் 07) நாம் குழந்தைகளாக இருக்கக் கூடாதா என்ற ஏக்கத்தை மனதில் விதைக்கின்றது. தாய் தனது மகளுக்கு பாடும் அழகிய பாடலாக இது காணப்படுகின்து.

எந்தன் மடி அன்பு மடி - நீ
எனக்கு செல்வமடி
உந்தன் கண்ணிரண்டில் தூக்கமடி
கவலையெல்லாம் போகுமடி

கண்ணுறுங்கும் நேரமடி யுன்
கலக்கமெல்லாம் தீருமடி
என் மடியும் உனக்காக
என்றைக்குமே இருக்குமடி!

இவ்வாறு அழகிய பாடல்களைக் கொண்டுள்ள இந்தப் புத்தகம் வாசிப்போரைக் கவரும். ஆசிரியருக்கு எமது வாழ்த்துக்கள்!!!

நூலின் பெயர் - தாலாட்டுப் பாடல்
நூலாசிரியர் - கவிஞர் பி.ரி. அஸீஸ்
வெளியீடு - பாத்திமா ருஷ்தா பதிப்பகம்
மின்னஞ்சல் - azeesphfo@gmail.com

Sunday, March 10, 2013

விடுமுறைக்கு விடுமுறை - சிறுகதைத் தொகுதி

விடுமுறைக்கு விடுமுறை சிறுகதைத் தொகுதி பற்றிய இரசனைக்குறிப்பு


ஓரிரண்டு கவிதைகளை எழுதி அவை பத்திரிகையில் வெளிவந்தாலேயே தமக்குத்தாமே கவிஞர் பட்டம் சூட்டிக்கொண்டு திரியும் பலபேர் நம் மத்தியில் இருக்க, விடுமுறைக்கு விடுமுறை என்ற காத்திரமான சிறுகதைத் தொகுப்பை வெளியிட்டும் கூட எந்தவிதமான ஆர்ப்பாட்டமும் இல்லாமல் இருக்கின்றார் திருமதி பவானி தேவதாஸ் அவர்கள்.

தலாத்து ஓயா தமிழ் மகா வித்தியாலயத்தில் ஆசிரியராகப் பணிபுரியும் இவரது கன்னித் தொகுதியான விடுமுறைக்கு விடுமுறை என்ற இச்சிறுகதைத் தொகுதி 11 கதைகளை உள்ளடக்கி 66 பக்கங்களில் புரவலர் புத்தகப் பூங்காவின் மூலம் வெளிவந்திருக்கிறது.

தற்கால வேலைப்பளுவுக்கு மத்தியில் சிறுகதைகளை வாசகர்கள் வாசிப்பது மிகக்குறைவு. ஆனாலும் பவானி தேவதாஸின் கதைகளை மேலோட்டமாக கண்டுவிட்டாலே அதை முழுவதுமாக வாசித்துவிட வேண்டும் என்ற உந்துதல் ஏற்படுவதை தவிர்க்க முடியாது. எழுதப்பட்ட கதைகளில் அநேகமானவை உண்மைச் சம்பவங்களாக இருப்பதால் அவை மேலும் சிறப்படைகின்றன.



நினைவில் நீங்காதவள் என்ற சிறுகதை 1983 இல் இனக்கலவரம் நடந்தபோது தமிழருக்காக தற்கொலை செய்துகொண்ட நீத்தா என்ற சிங்கள யுவதியை அடிப்படையாகக் கொண்டு எழுதப்பட்டுள்ளது. யாழ்ப்பாணத் தமிழ்க் குடும்பம் ஒன்றில் வீட்டுவேலை செய்கிறாள் நீத்தா. குறிப்பிட்ட தினமன்று அந்த வீட்டிற்கு சிலர் கல்லெறிந்து கலாட்டா பண்ணியிருக்கிறார்கள். தமிழர் வீட்டில் உனக்கென்ன வேலை என்று கேட்டவர்கள் மறுபடி வரும்போது அவளை அங்கிருந்து போகுமாறு சொல்லிவிட்டு போகிறார்கள்.

எனினும் வீட்டார்கள் அவளை நம்பி விட்டுப்போனதால் அந்தத் தமிழர்களின் உடமைகளை பாதுகாப்பதை தனது கடமையாகவே கருதுகிறாள் நீத்தா. மறுதினம் வன்முறையாளர்கள் வந்து தமிழர்கள் வாழ்ந்த அவ்வீட்டை எரிக்க அத்துக்கம் தாளாமல் அழுதபடியே தாயுடன் வருகிறாள் நீத்தா. யாரும் எதிர்பாராத விதமாக அப்போது வந்த புகைவண்டிக்கு குறுக்காக பாய்ந்து தனது துக்கத்தை வெளிப்படுத்திய நீத்தாவே இக்கதையில் நாயகி.

என் இனிய தோழனே என்ற கதை சிறுவயதிலிருந்து சகோதரனாகவே பழகி வந்த சிங்கள நண்பனின் மரணம் பற்றியது. பஸ்ஸில் மற்ற இளைஞர்கள் கிண்டல் பண்ணும்போது தனது தங்கை என்று கூறி அவர்களுடன் சண்டையிடுகிறான் சூட்டிக்கா என்ற அந்த நண்பன். இறுதியில் இராணுவத்தில் இணைந்து யுத்தத்துக்கு இலக்காகி இறந்துவிடுகிறான். இந்தக் கதையை வாசிக்கும்போது மனம் வலியால் துடிக்கின்றது.

சமவெளி - சிகரம் என்ற சிறுகதை இணைபிரியாது பழகி இறுதியில் சுனாமிக்கு பலியான நண்பிகளின் கதையை துல்லியாக கூறி நிற்கிறது. மலைநாட்டைச் சேர்ந்த நந்தினி, மட்டக்களப்பைச் சேர்ந்த மாயா. இருவரும் பிரதான பாத்திரங்கள். படிப்பதற்காக மட்டக்களப்புக்குச் சென்ற நந்தினியுடன் ஐக்கியமாகும் மாயா. உயர்த பரீட்சையின் பின்னர் நந்தினி ஊருக்கு புறப்படுகின்றாள். கிறிஸ்மஸ் தினத்துக்கு மறுநாள் அவளது மனதில் இனம்புரியாத தவிப்பு.. இறுதியில் சுனாமி அரக்கன் மாயாவை கொன்றுவிடுகின்றான். மெய்சிலிர்க்க வைக்கும் கதை. அதற்காக திருமதி பவானி அவர்கள் கையாண்டிருக்கும் அழகான கதையோட்டத்தால் சம்பவம் கண்முன் நிழலாடுகிறது. நெஞ்சம் விம்மித் தணிகின்றது.

பிறந்தகத்தில் பிறந்த நாள் என்ற கதை பலருக்கும் ஏற்பட்ட அனுபவங்களாகவும் இருக்கலாம். திருமணமாகி வேறிடம் போகும் பெண்கள் தமது பிறந்த வீட்டுக்கு கணவர் பிள்ளைகளுடன் வரும்போது எதிர்கொள்ளும் சிக்கல்களை இக்கதை சொல்லி நிற்கிறது. அதுவும் சகோதரர்களின் அலட்சியப்போக்கும், அவர்களின் மனைவிமாரின் சிடுசிடுப்பும் ஏன் வந்துதொலைத்தோம் என்ற மனப்பாங்கை தோற்றுவிக்கும். அதை நிதர்சனபூர்வமாக வெளிப்படுத்தியிருக்கிறார் நூலாசிரியர்.

ஏன் என்ற கதை நோயால் அவதியுற்று இறந்துபோன மகன், மகள், மனைவி பற்றியது. மிகவும் சோகத்துக்குரிய நிகழ்வுகளை உள்ளடக்கியதாக இக்கதை காணப்படுகின்றது. தன்னை விட்டுப் பிரிந்துபோன தனது குடும்பத்தினரை எண்ணி கணவன் படும் அவஸ்தை வாசகருக்கும் தொற்றிவிடுகின்றது.

இவ்வாறு கற்பனைகளுக்கு உயிரிகொடுத்து அவற்றை எல்லாம் கதைகளாக்கும் முறைகளிலிருந்து முற்றிலும் மாறுபட்டு பெரும்பாலான தனது அனுபவங்களை கருக்களாக்கி அதை சிறுகதைகளாய் பிரசவித்திருக்கிறார் திருமதி. பவானி தேவதாஸ் அவர்கள். அவரது இலக்கிய முயற்சி இன்னும் சிறப்புற வாழ்த்துக்கள்!!!

நூலின் பெயர் - விடுமுறைக்கு விடுமுறை (சிறுகதை)
நூலாசிரியர் - பவானி தேவதாஸ்
வெளியீடு - புரவலர் புத்தகப் பூங்கா
விலை - 150 ரூபாய்

மண்ணில் வேரோடிய மனசோடு - கவிதைத் தொகுதி

மண்ணில் வேரோடிய மனசோடு கவிதைத் தொகுதி பற்றிய இரசனைக் குறிப்பு


பல சந்தர்ப்பங்களில் வானொலி, தொலைக்காட்சிகளின் கவிதை நிகழ்ச்சிகளை அலங்கரித்து வருகின்றவரும், ஆசிரியராக கடமையாற்றி வருகின்றவருமான கலாபூஷணம் யாழ் அஸீம் அவர்களின் மண்ணில் வேரோடிய மனசோடு என்ற தொகுதி 125 பக்கங்களில் ஸூபைதா பதிப்பகத்தினால் வெளிவந்திருக்கிறது. தேசிய நூலபிவிருத்தி ஆவணவாக்கல் சபையின் அனுசரணையுடன் வெளியிடப்பட்டிருக்கும் இந்நூலில் 23 கவிதைகள் இடம்பெற்றிருக்கின்றன. கவிஞரின் கன்னித்தொகுதியான இதில் காத்திரமான கவிதைகள் வெளிவந்திருக்கின்றன.

`கவிஞர்கள் சிலர் பிறக்கிறார்கள். சிலர் உருவாகிறார்கள். யாழ் அஸீம் அவர்களால் மரபுக் கவிதையும் எழுத முடிகிறது. புதுக் கவிதையும் எழுத முடிகிறது...' என தாஜூல் உலூம் கலைவாதி கலீல் அவர்களின் முன்னுரையில் குறிப்பிட்டுள்ளவாறு அஸீம் அவர்களின் கவிதைகளை வாசித்த மாத்திரத்தில் அவற்றின் தன்மைகளையும், சிறப்புக்களையும் புரிந்துகொள்ளலாம். இலகுவில் புரிந்துகொள்ளக்கூடிய வகையில், சிறந்த சொல்லாட்சியுடன் எளிமையாக கவிதைகள் எழுதப்பட்டிருக்கின்றன. 

வட புல முஸ்லிம்கள் மொத்தமாக துடைத்தெறியப்பட்ட வேதனைகளின் விசும்பல்கள் கவிதைத்தொகுதி முழுவதிலும் முகாரியாக ஒலிக்கிறது. `வேரோடு பிடுங்கி வீசப்பட்டு வலிகளுக்குள் வாழும் வடபுல முஸ்லிம்கள் யாவருக்கும்' இத்தொகுதி சமர்ப்பிக்கபட்டிருக்கின்றது. சொந்த மண்ணைவிட்டு இடம்பெயர்ந்து வாழும் ஒட்டுமொத்த இதயங்களின் ஓலமாக மிளிர்ந்திருக்கிறது மண்ணில் வேரோடிய மனசோடு என்ற இந்தக் கவிதைத்தொகுதி.


இது கவிதையல்ல (பக்கம் 06) என்ற முதல் கவிதை காயம்பட்ட இதயத்தை கண் முன்னால் நிறுத்தி வைக்கிறது. ஒருதாய் வயிற்றுப் பிள்ளைகளாய் கூடி வாழ்ந்தவர்கள் இடையில் துவேசம் கொண்டவர்களாக ஆனதில் உள்ள விரக்தியைக் காண முடிகிறது. ஆரம்பத்தில் தமிழ் பேசுவதால் இஸ்லாமியத் தமிழர் என உறவு கொண்டாடி மகிழ்ந்தவர்கள்தாம் முஸ்லிம்களும், தமிழர்களும். ஆனால் இடையில் ஏற்பட்ட இனச் சுத்திகரிப்பு முழு முஸ்லிம் சமுதாயத்தையும் இடம்பெயரச் செய்துவிட்டது. இப்போது எம்மை எந்தத் தமிழரென அழைக்கப்போகிறீர் என கவிஞர் கேட்டிருக்கும் கேள்வி, இதற்கு தூண்டுதலாக அமைந்தவர்களின் நாக்கைப் பிடுங்கவல்லது எனலாம்.

இது கவிதையல்ல 
கற்கள்
நேயம் கொண்ட இதயம்
காயப்பட்டதால்..
இதயத்திலிருந்து
இதயத்துக்கு வீசும்
கவிதைக் கற்கள்
ஒட்டி வாழ்ந்த உறவுகளை
வெட்டி வீழ்த்திய வீரர்களே!

இஸ்லாமியத் தமிழரென
எமை அழைத்தீர்
இப்போது
எந்த வகைத் தமிழரென
எமை வெறுத்தீர்!

வாழ்க்கையில் எந்த பதவி உயர்வு கிடைத்தாலும், அந்தப் பதிவியுயர்வாலோ அல்லது கல்வியாலோ வேறு தேசம் சென்றாலும் தாய் மண்ணின் சுகத்தை நினைக்கையில் ஆன்மா கதறியழும்.  ஊர்மண்ணில் வெறுங்காலில் திரிய மனம் அவா கொள்ளும். இப்படியிருக்க துரத்தியடிக்கப்ட்வர்கள் இனி எப்போது ஊருக்கு செல்வோம் என்றே தெரியாமல் இருக்கும்போது அவர்கள் மனம் எத்தகைய பாடுபடும் என்பதை மண்ணின் காலடிக்கு.. (பக்கம் 20) என்ற கவிதையிலுள்ள கீழுள்ள வரிகள் மூலம் நமக்கு உணர்த்துகின்றார். தாய் 

பொன்னிழந்து வாழ்ந்திடலாம்
பொருளிழந்து வாழ்ந்திடலாம்
மண்ணிழந்து வாழ்வதொரு வாழ்வோ
கண்ணிழந்த வாழ்வு போலன்றோ?

பால்ய வயதுகளில் நண்பர்களோடு இணைந்து செய்த குறும்புத்தனங்கள் இப்போது நினைவு வந்தாலும், தூறல் மழையில் நனைவது போன்ற இதத்தை ஏற்படுத்திச் செல்லும். அவ்வாறே சிறுவயதில் சாப்பிட்ட இனிப்புக்கள், பலகாரங்கள், ஊரின் விசேட சாப்பாடுகள் என்பன ஞாபகத்துக்கு வரும் வேளைகளில் சிறுகுழந்தையாய் இதயம் தடுக்கிவிழும். அவ்வாறானதொரு நிகழ்வையும், அந்தச் சுகம் இனி சொந்த மண்ணில் கிட்டுமா என்ற எதிர்பார்ப்போடும் கவிஞர் கீழுள்ள வரிகளை கூறியிருக்கிறார். மண்ணில் வேரோடிய மனசோடு (பக்கம் 41)

கணங்கள் யாவுமே
கதைகள் பல சொல்ல
கனவுகளாய் விர்ந்து
கண்ணுக்குள் நிழலாட
நெஞ்சுக்குள் இனிக்கிறது

மண்ணில் வேரோடிய 
மனசோடு வாழுகிறோம்
மீட்டிடும் பொழுதுகள் யாவும்
மீளாதோ மீண்டும்
நிஜங்களாய் நாளை!

எந்த மதத்தவர் என்றாலும் தத்தமது மதத்துக்குரிய பக்தி அவர்களிடம் காணப்படுதல் இயல்பே. அவ்வகையில் புனித இஸ்லாம் மதத்தைக் கொண்ட நாங்களும் அல்லாஹ்வுக்கு அடிபணிந்து அவன் தூதர் வழி நடப்பதுதான் வெற்றியைத் தரும். எது நடப்பினும் எனக்குக் கவிலையில்லை. எனது குருதியின் ஒவ்வொரு துளியும் உச்சரிக்கும் கலிமாவை என்று ஈமானிய ரசம் பொங்க உறுதியாக கூறி நிற்கிறார் யாழ் அஸீம் அவர்கள். இது எங்கள் வரலாறு (பக்கம் 55)

என்னை
வெட்டித் துண்டாக்கு
சுட்டுப் பொசுக்கு
வேரோடு பிடுங்கி வீசு!
வீழும் உடலின்
ஒவ்வோர் அணுவும்
ஓடும் குருதியின்
ஒவ்வொரு துளியும்
உச்சரிக்கும் கலிமாவை!

முகாம்களில் அடைந்து வாழும் வாழ்க்கையப் பற்றியும் கவிதை எழுதத் தவறவில்லை யாழ் அஸீம் அவர்கள். எந்தவித சுகாதார வசதிகளும் அற்று, அடுத்த வேளை உணவுக்காய் அல்லல்படும் மனிதர்களின் மனங்கள் எத்தகைய துன்பத்தை அனுபவிக்கும். பணக்காரராக வாழ்ந்தவர்கள் பரதேசிகளாக ஆன நிலையில் காலத்தை கடத்தும் வேதனையை யாரிடம் சொல்லி அழுவார்கள்? வெளிச்சம் வெளியேயும் இல்லை (பக்கம் 63) என்ற கவிதை வரிகள் எம் மனதையும் நெகிழ வைக்கின்றன.

புன்னகையை விற்றுக்
கண்ணீரைக் கடன் வாங்கிய
இவர்கள் வியாபாரத்தில்
எஞ்சியது சில மூச்சுக்கள்தான்!

கிழிந்த ஆடைகளைப் பற்றிக் 
கவலைப்படுவதில்லை
இவர்கள் கவலையெல்லாம் - நம்
கிழிந்த வாழ்க்கையைப் பற்றித்தான்!

பல்வேறுபட்ட ஆளுமைகளைக் கொண்டிருக்கும் கவிஞர் யாழ் அஸீம் அவர்கள் சிறந்த கவிதைத் தொகுதியை வெளியிட்டு, அவற்றை மக்கள் மனதில் பதியச் செய்துவிட்டார். அவர்; இன்னும் பல படைப்புக்களை எழுதி புத்தகங்களாய் வெளியிட வேண்டுமென்று வாழ்த்துகிறேன்.


நூலின் பெயர் - மண்ணில் வேரோடிய மனசோடு 
நூலாசிரியர் - யாழ் அஸீம்
வெளியீடு - ஸுபைதா பதிப்பகம்
முகவரி – 228/1, ஜும்ஆ மஸ்ஜித் வீதி, மாளிகாவத்தை, கொழும்பு – 10.
தொலைபேசி – 0717 268466
விலை - 300 ரூபாய்

Friday, August 10, 2012

பாவைப் பிள்ளை - சிறுவர் பாடல் தொகுதி

பாவைப் பிள்ளை சிறுவர் பாடல் தொகுதி பற்றிய இரசனைக் குறிப்பு

சிறுவர் படைப்பிலக்கியத்தில் ஆழமாக தனது ஆற்றலை வெளிப்படுத்தி வருபவர்களுள் திருகோணமலை செ. ஞானராசா அவர்களும் முக்கியமானவர். தனது மூன்றாவது சிறுவர் நூலாக பாவைப் பிள்ளை என்ற தொகுதியை வெளயிட்டிருக்கின்றார்.

சிறுவர் பா அமுதம் இவரது முதல் தொhகுதியும், புதிய பாதை என்பது இவரது இரண்டாவது தொகுதியுமாகும்.

அதிபராக கல்விப் பணியாற்றி வருவதுடன் கவிதை, சிறுகதை, கட்டுரை போன்ற துறைகளிலும் தனது ஆளுமையை வெளிப்படுத்தி வரும் செ. ஞானராசா அவர்கள் இலங்கை தேசிய நூலக அபிவிருத்தி சபையால் இப்புத்தகத்துக்குரிய சான்றிதழையும் பெறிருக்கின்றார்.

மொத்தம் 20 பாடல்களை உள்ளடக்கி வெளிவந்திருக்கும் இந்நூலானது  47 பக்கங்களில், வர்ணப் படங்களுடன் சர்வீனா வெளியீட்டகத்தால் வெளியிடப்பட்டிருக்கிறது.

இவ்விரண்டு வரிகளில் வாழ்க்கையின் அத்தனைப் பகுதிகளையும் தெட்டத் தெளிவாக கூறியிருப்பது திருக்குறள் என்று பலரும் சொல்வர். திருக்குறள் இன்று பல மொழிகளில் மொழிபெயர்க்கப்பட்டுள்ளது. அத்தகைய மேன்மை பொருந்திய நூல் பற்றி சிறுவர்களும் உணர வேண்டும் என்பதற்காய் திருக்குறள் என்ற முதல் பாடலின் சில வரிகள் இவ்வாறு வருகிறது.

இரண்டு வரியில் உள்ளதாம்.
இனிய கருத்து நிறைந்ததாம்
திரண்ட செய்தி சொல்லுமாம்
திருவள்ளுவர் தந்ததாம்

செய்ய எதை வேண்டுமோ
செய்ய எதை வேண்டாமோ
மெய் உணர்த்தி வைக்குமாம்
மேன்மையான குறளதாம்

வேளைப்பளு அதிகரித்திருக்கும் இன்றைய காலத்தில் தந்தை மாத்திரமன்றி தாயும் தொழிலுக்குச் செல்லும் தேவை அல்லது திண்டாட்டம் வலுப்பெற்றிருக்கிறது. அவ்வாறாயின் அலுவலகத்துக்கு செல்லும் அவதியில் அவசர உணவுகள் தான் இன்று கைகொடுக்கின்றன.

பிட்டு, இடியப்பம், தோசை போன்ற பாரம்பரிய உணவுகள் மறக்கப்பட்டு பாஸ்ட்புட் உணவுகள் எம்மை ஆக்கிரமித்துவிட்டன. நல்லது என்ற தலைப்பிடப்பட்ட பாடல் சத்துணவுகளை இன்னொருமுறை ஞாபகப்படுத்துமாற்போல் இருப்பதை அவதானிக்கலாம்.

பாலும் பழமும் நல்லது
பச்சைக் காய்கறி நல்லது

பருப்பும் கிழங்கும் நல்லது
பலம் தருவதில் வல்லது

மீனும் முட்டை இறைச்சியும்
மிகவும் ஊட்டம் உள்ளது

சிறுவர்களை மாத்திரமல்லாது கவிஞர்களையும் கவர்ந்த ஒரு அதிசயம் நிலா. நிலாவைப் பற்றி எப்படியெல்லாமோ, யார் யாரெல்லாமோ கூறி விட்டார்கள். ஆனாலும் படைப்பாளிகள் ஒவ்வொருவரும் தமது ரசனைக்கேற்றாற்போல நிலவினைப் பற்றி பாடிக்கொண்டு தான் இருக்கின்றார்கள். நூலாசிரியரும் பாடுகிறார் இவ்வாறு..

நிலாப்பாட்டு பாடியே
நிலாவோடு சேருவோம்
உலாப் போகும் வெளியினை
உல்லாசமாய் நாடுவோம்

இரவைத் தேடும் உறவுப்பூ
இருளில் அழகு காட்டுதே
வரவுக்காக காப்பதால்
வழியில் மகிழ்ச்சி பூக்குதே

இலங்கை நாடு எம் நாடு என்று வெறுமனே பாடிக் கொண்டிருக்காமல் மூவின மக்களும் சமமானவர்கள், தாய் நாட்டை நாம் பாதுகாக்க வேண்டும் என்ற கோட்பாட்டை மாணவர்கள் மத்தியில், எதிர்கால சந்ததியினர் மத்தியில் உருவாக்க வேண்டும். அப்போதுதான் நாட்டில் அமைதியும், சுபீட்சமும் தோன்ற வழி பிறக்கும். கடந்த காலங்கள் போன்று எதிர்காலங்கள் ஆகிவிடக்கூடாது. ஒற்றுமையை வலியுறுத்தும்  முயற்சியாக எங்கள் நாடு என்று தலைப்பிட்ட கவிதையின் சில வரிகள் இதோ..

இந்து இஸ்லாம் பௌத்தம்
இனிய கிறிஸ்தவமும்
இந்த நாட்டின் நெறியாய்
இருக்கும் ஒரே விதமாய்

இனங்கள் பல உண்டு
இலங்கையர் நாம் என்று
சனங்கள் உணர்ந்து கொண்டால்
சரிசமமாய் வாழ்வோம்

நலன்புரி நிலையங்களில் வாழ்க்கை நடாத்துபவர்கள் அடிப்படை வசதிகள்கூட இல்லாமல் வாழுவதை அறிந்திருக்கிறோம். அவர்களுக்கு எம்மாலான உதிவிகளைச் செய்ய வேண்டும். சொந்த மண்ணில் இருக்கும்போது மகிழ்ச்சியாக வாழ்ந்தவர்கள் எல்லாம் இன்று கண்ணீர் கதைகளோடும், நினைவுகளோடும் வாழ்கின்றார்கள். கடந்துவிட்ட அவர்களது வாழ்வு மீண்டும் கிடைக்காதா என்ற ஆதங்கத்தோடு வாழு(டு)ம் அவர்கள் பற்றி நூலாசிரியர் செ. ஞானராசா அவர்கள் தனது நலன்புரி நிலையம் என்ற பாடலில் இவ்வாறு கூறியிருக்கின்றார்.

நலன்புரி நிலைய மாணவர்கள்
நலம் பல இழந்து போனவர்கள்
பலன் பெற உதவி செய்திடவே
பாசமாய் எழுந்து வாருங்கள்

வன்னியில் இருந்த போதினிலே
வாய்ப்பு வசதிகள் அவர்க்குண்டு
அன்னியப்பட்டுப் போனதினால்
அடிப்படை உரிமை இழந்தாரே

தனது பாடல்களால் சின்னஞ் சிறார்களை கவரும் வல்லமை ஆசிரியருக்கு இருக்கிறது. நூலுருவாக்கத்தில் நன்கு திட்டமிட்டு பயனுள்ள விடயங்களை சேர்திருக்கும் நூலாசிரியருக்கு எமது வாழ்த்துக்கள்!!!

பெயர் - பாவைப் பிள்ளை (சிறுவர் பாடல்;)
நூலாசிரியர் - செ. ஞானராசா
முகவரி - 993, Anbuvalipuram, Trincomalee, Sri Lanka.
தொலைபேசி - 026 3267891, 077 5956789
வெளியீடு - சர்வீனா வெளியீட்டகம்
விலை - 200 ரூபாய்

குற்றமும் தண்டனையும் - சிறுகதைத் தொகுதி

குற்றமும் தண்டனையும் சிறுகதைத் தொகுதி பற்றிய இரசனைக் குறிப்பு

பல வருடங்களாக ஆசிரியராகப் பணியாற்றி ஓய்வு பெற்றிருக்கும் எம்.பி.எம். நிஸ்வான் அவர்கள் சிறந்த சிறுகதை எழுத்தாளராவார். மூன்றாம் தலாக் என்ற அவரது முதல் சிறுகதைத் தொகுதி பல மட்டங்களிலும் பேசப்பட்டதொரு நூலாகும். அதைத் தொடர்ந்து குற்றமும் தண்டனையும் என்ற தொகுதியை அவர் வெளியிட்டிருக்கிறார். இந்தத் தொகுதி 108 பக்கங்களில் ரஹ்மத் பதிப்பகத்தின் வெளியீடாக மலர்ந்திருக்கிறது.

தலையங்கங்களுக்கு ஏற்ற விதமாக சிறப்பான படங்களை வழங்கியிருக்கிறார் கலைவாதி கலீல் அவர்கள்.

சிந்திக்கத் தக்கவை. இன்று எழுதப்படும் பல விடயங்களில் அர்த்தங்கள் என்று எதுவுமிருக்காது. அப்படியின்றி சமூகம் சார்ந்த, உணர்வு பூர்வமான விடயங்களை முன்வைக்கும்போது சிறுகதைகள் வழிகாட்டிகளாகவும் மாறிவிடுகின்றன. இது பற்றி நூலாசரியர் நிஸ்வான் அவர்கள் தனது உரையில் கூறியிருக்கும் வாசகங்கள்.


`கதைகள் மக்கள் பிரச்சினையை யதார்த்தபூர்வமாக சித்தரிக்கும் கலைத்துவ சிருஷ்டிகளாக அமையும் பட்சத்தில் அவை மக்கள் கலையாக மாறுகின்றன. சமூகப் பார்வையற்ற மனிதப் பிரச்சினைகளை அணுகாத கதைகள் யதார்த்தமானதல்ல'.

வெளிநாட்டுக்குச் சென்று உழைத்தல் என்பது இன்று நேற்று நடக்கும் விடயமல்ல. பல வருடங்களாக தொடரும் இந்த பழக்கத்தால் பலர் நன்மை அடைந்திருக்கிறார்கள். பலர் பாதிக்கப்ட்டிருக்கிறார்கள். இத்தொகுதியின் முதல் கதையாக வருகின்ற குற்றமும் தண்டனையும் என்ற கதையும் மேற்சொன்ன பிரச்சினையை இயம்பி நிற்கின்றது.

குடும்பத் தலைவன் தனது மனைவி பிள்ளைகளுக்காக உழைக்கவென்று வெளிநாடு செல்கிறான். வருடங்கள் ஐந்து கடந்த நிலையில் சந்தோஷமாக வீடு திரும்புகிறான். வந்து ஓரிரண்டு தினங்கள் கடந்த நிலையில் மனைவி அவனின் காலில் விழுந்து மன்னிப்புக் கேட்கிறாள். அதற்கான காரணத்தை அறிந்தவனுக்கு தலையே சுற்றுகிறது.

அதாவது ஷமனைவிக்கு வேறொருவனுடன் தொடர்பு இருந்திருக்கிறது|  என்பதை மனைவி மூலமே அறிகின்றான். இதைப்பற்றி ஒரு பெரியவிரடம் ஆலோசனை கேட்கும்போதுதான் தனது பிழையை உணருகிறான் குடும்பத் தலைவன்.

மனைவியை தனிமையில் விட்டுச் சென்றால் சிலவேளைகளில் இவ்வாறான பாதிப்புக்கள் நிகழலாம். அதைப் பற்றின விழிப்புணர்வுக் கதையாகவே இது எழுதப்பட்டுள்ளது.

கல்வி ஒருவனுக்கு எவ்வளவு முக்கியமோ அதைவிட முக்கியம் ஒழுக்கம் என்பதாகும். ஒழுக்கமற்ற கல்வியால் எந்தப் பலனும் கிடையாது. பாடசாலை மாணவர்கள் இன்று மிகவும் துர்நடத்தை உள்ளவர்களாக மாறி வருவதை அவதானிக்கலாம்.

பாதைகளில் போகும்போது வரிசையாக செல்லாமல் கத்திக்கொண்டும், பாதையில் வருவோர் போவோரை பகிடி பண்ணியவாறும் செல்கின்றார்கள். பெண் பிள்ளைகளைக் கண்டால் போதும் ஏதேதோ கூறி தங்களுக்குள் சிரித்துக்கொள்வார்கள். ஆசிரியர்களை மதிப்பதில்லை. இவ்வாறான விடயங்களை வைத்து எழுதப்பட்டிருக்கும் கதையே ஒழுக்கம் இல்லாத கல்வி என்பதாகும்.

காலம் எவ்வளவுதான் முன்னேறினாலும் வரதட்சணை என்ற சம்பிரதாயம் மாறுவதாக இல்லை. இன்றைய இளைஞர்கள் இது சம்பந்தமாக சிந்திக்க வேண்டும். மஹர் கொடுத்து மணமுடிக்க வேண்டியவர்கள் சீதனத்தை பெறுவது என்பது எவ்வளவு வெட்கக்கேடான செயல் என்பதை சிந்திக்க வேண்டும். நிலைகெட்ட மனிதர்கள் என்ற கதையில் வரும் பிரச்சினையும் மேற்சொன்னதுதான்.

மாமியர் வீட்டுக்குப் போன பெண்ணை மாமியாரும் மதினியும் வார்த்தைளால் கொல்லுகிறார்கள். அந்த ஊரில் ஏதாவது ஒரு திருமணம் நடந்தால் அந்த வீட்டவர்கள் வீடு கொடுத்தார்கள், நகை கொடுத்தார்கள். நீ என்ன கொண்டு வந்தாய் என்றெல்லாம் குத்தலாகப் பேசுவார்கள். கணவனிடம் சொன்னால் உண்மையைத்தானே சொல்கிறார்கள் என்று கணவன் சொல்கிறார். இப்படியிருக்க அந்தப் பேதை தீக்காயங்களுக்கு இரையாகி இறந்து போகிறாள். இது தற்கொலையா, கொலையா என்று யாருக்கும் தெரியவில்லை. பணத்துக்காக என்னென்னமோ நடக்கிறது. இப்படியும் நடக்கிறது என்றவாறு நிறைவுறுகிறது இந்தக் கதை.

அந்த ஒரு நிமிடம் என்ற கதை குடும்பப் பகையையும், காதலையும் உள்ளடக்கியது. சொந்த அண்ணன் தங்கச்சியின் பிள்ளைகளான மச்சானும், மச்சாளும் காதலிக்கிறார்கள். ஆனால் சொத்துப் பிரச்சினையால் குடும்பங்களிரண்டும் ஜென்மப் பகை. ஆதலால் இருவரும் ஊரைவிட்டு ஓட திட்டம் தீட்டுகின்றனர். இந்த விடயம் ஊரிலுள்ள பெரியவர்களுக்கு எட்டுகின்றது. இவ்hறானதொரு இழிகாரியம் நடந்தால் அது சமூகத்துக்கும் பாதிப்பு. குறிப்பிட்ட இரண்டு குடும்பங்களுக்கும் பாதிப்பு. ஆதலால் இரு வீட்டாருடன் கலந்து பேசுவதாகக் கூறி சமாதானப்படுத்துகின்றனர் ஊர் பெரியோர்கள்.

கண்டிஷன் மாப்பிள்ளை என்ற கதை சிரிக்கவும் வைக்கிறது. சிந்திக்கவும் வைக்கிறது. பல லட்சங்கள், நகை, வீடு, மாப்பிள்ளையின் பக்கத்திலிருந்து வருவோர் அனைவருக்கும் சாப்பாடு யாவற்றையும் பெண்ணின் வீட்டார் செய்ய வேண்டும் என்பதும், திருமணம் பெரிய பணக்கார ஹோலில் நடைபெற வேண்டும் என்பதும் மாப்பிள்ளை வீட்டாரின் கண்டிஷன்.

எல்லா கண்டிஷனுக்கும் பெண் வீட்டார் ஒத்துக்கொள்கின்றனர். காரணம் மாப்பிள்ளை வெளிநாட்டில் வேலை. மாப்பிள்ளையின் தகப்பனும் பெரிய தனவந்தர். ஊரில் நடக்கும் எல்லா காரியங்களுக்கும் முதல் ஆளாக அழைக்கப்படும் செல்வாக்கு கொண்டவர். ஆதலால் எப்படியேனும் அவரின் மகனை தமது மருமகனாக்கிக்கொள்ள பிரயத்தனப்படுகின்றனர்.

திருமண நாளன்று மாப்பிள்ளை வர தாமதமாகிறது. பெண் தரப்பிலிருந்து மாப்பிள்ளையை அழைத்து வரப் பேகின்றார்கள். போன இடத்தில்தான் தெரிகிறது அவர்கள் யாரும் திருமணத்துக்கு வரமாட்டார்கள் என்று. காரணம் ஷஇரண்டாம் இலக்க மண்டபம் மாப்பிள்ளைக்கு போதவில்லையாம். முதல் மண்டபத்தில் கல்யாணம் நடைபெறாதது மாப்பிள்ளைக்கு செய்த அவமரியாதையாம்|.

இவ்வாறான பல சமூக விடயங்களை தனது கதைகளில் உள்ளடக்கி விழிப்புணர்ச்சியை ஏற்படுத்தியிருக்கும் நூலாசிரியருக்கு எமது வாழ்த்துக்கள். அவரிடமிருந்து இன்னும் பல படைப்புகளை எதிர்பார்க்கிறோம்!!!

நூல் - குற்றமும் தண்டனையும் (சிறுகதை)
நூலாசிரியர் - எம்.பி.எம். நிஸ்வான்
முகவரி - ரஹ்மத், 6 ஏ, யோனக மாவத்தை, வத்தல்பொல, கெசெல்வத்தை, பாணந்துறை.
தொலைபேசி - 0382297309
வெளியீடு - ரஹ்மத் பதிப்பகம்
விலை -  200 ரூபாய்

Wednesday, June 20, 2012

பூஞ்சிறகுகள் - சிறுவர் பாடல்

பூஞ்சிறகுகள் சிறுவர் பாடல் மீதான இரசனைக் குறிப்பு

புரவலர் புத்தகப் பூங்காவின் வெளியீடாக மேக வாழ்வு எனும் கவிதைத் தொகுதியையும், நோன்பு என்ற பெயரில் சிறுவர் கதை நூலொன்றையும் தந்த வெளிமடை ரபீக் அவர்கள் தனது அடுத்த தொகுதியை சிறுவர் பாடல்களாக வெளிக் கொணர்ந்திருக்கிறார். 22 பக்கங்களை உள்ளடக்கிய பூஞ்சிறுகுகள் என்ற இந்த நூல் வர்ணப் படங்களையும் ஏந்தி அழகாக காட்சியளிக்கின்றது. சிறுவர்களின் மனதைக் கவரும்படியான அழகிய பாடல்களும், படங்களும் இதில் உள்ளடக்கப்பட்டிருக்கின்றமை புத்தகத்தின் சிறப்பம்சமாகும்.

வெள்ளாப்பு வெளியின் வெளியீடாக மலர்ந்திருக்கும் இந்நூல் பற்றி குழந்தைகள் போலவே குழந்தை இலக்கிய வடிவங்களும் வடிவழகு மிளிர்பவை. எளிமையும், எழிலும் பூப்பவை. குழைவு மொழியாய் குதூகலிப்பவை. தேனோசையில் சுரந்து வழிபவை. பூஞ்சிறகுகளாய் புளகாங்கிப்பவை என்கிறது வெள்ளாப்பு வெளி வெளியீட்டகம்.


ஈழக்கவி நவாஸ் ஏ. ஹமீட் அவர்கள் நூலின் சிறப்பம்சம் பற்றி இவ்வாறு குறிப்பிட்டிருக்கின்றார். சிறுவர் இலக்கியங்களைப் படைப்போர் குழந்தைக்கல்வி, குழந்தை உளவியல், குழந்தைகளுக்குரிய கற்பித்தலியல், சிறுவர் அழகியல், சிறுர்களுக்கான மொழி, ஓசை, பாடுபொருள் முதலிய பல்வேறு துறைகளிலும் அறிவு மிக்கவர்களாயிருத்தல் இத்தகைய உயிர் துடிப்புமிக்க பாடல்களை எழுதியிருக்கிறார்.

திரு. ரபீக் அவர்கள் ஆரம்பப் பிரவுக்கான ஆசிரியப் பயிற்சியையும் பட்டப்பின் படிப்பின் மூலமாக உளவியலையும் அறியப் பெறறிருப்பவர் ஆரம்ப, உயர்தர வகுப்புக்களுக்கு கற்பித்த ஆசிரியர் ரபீக் அவர்கள் தற்போது வெளிமடை வலயக் கல்விக் காரியாலயத்தில் ஆசிரிய ஆலோசகராக கடமையாற்றுகிறார்,

அம்மா என்ற முதல் பாடலானது அகர வரிசைப்படி எழுதப்பட்டிருக்கின்றது. தாயினதும், இரண்டு பிள்ளைகளினதும் வர்ணப்படமும் இக்கவிதைக்காக சேர்த்துக் கொள்ளப்பட்டிருக்கின்றது. அதன் சில வரிகள் இதோ..

அம்மா எங்கள் அம்மா
ஆசையான அம்மா
இனிமையான அம்மா
ஈகை வழங்கும் அம்மா

உணவு சமைக்கும் அம்மா
ஊஞ்சல் ஆட்டும் அம்மா
எனக்கு விருப்பம் அம்மா
ஏற்றம் காட்டும் அம்மா...

தங்கை என்ற பாடல் இனிமையாகவும், ஓசை நயம் மிக்கதாகவும் காணப்படுகின்றது. நிலவைப் பற்றியும் பாடலினூடாக கூறும் கவிஞர் சிறுவர்கள் விரும்பும் பாடலாக இதை புனைந்திருக்கிறார் என்றால் மிகையில்லை.

தங்க நிலவு வானிலே
தவழும் அழகைக் காணவே
தங்கை வந்து நிற்கிறாள் - கையைத்
தட்டித் தட்டிச் சிரிக்கிறாள்!

அங்கும் இங்கும் பார்க்கிறாள் - அந்த
அழகிய நிலவைக் கேட்கிறாள்
மங்கல் வானைப் பார்க்கிறாள் - நிலவு
மறைவதெப்படி? கேட்கிறாள்..

துயில் கொண்டிருக்கும் தன் குட்டித் தம்பியை ஒரு சிறுமி பள்ளிக்கூடம் போவதற்காக எழுப்புகிறாள். அந்த விடயத்தை பாடல் மூலம் தந்திருக்கிறார் கவிஞர். சிறுவன் கட்டிலில் தூங்குவது போன்றும், அவனருகே ஒரு சிறுமியும், கடிகாரமும் சித்திரத்தில் காணப்படுகின்றன. தம்பியை எழுப்பும் அந்தக் காட்சி சித்திரமாக்கப்பட்டிருக்கின்றமை சிறுவர்களை கவர்ந்துகொள்ளும்.

சோம்பல் நீயும் கொள்ளாதே
சோர்ந்து நீயும் தூங்காதே
வீம்பு நீயும் கொள்ளாதே
விரைவாய் தம்பி எழுந்திடுவாய்

பள்ளி செல்ல வேண்டுமே
பாடம் படிக்க வேண்டுமே
துள்ளி நீயும் எழுந்திடுவாய்
தூக்கம் வேண்டாம் எழுந்திடுவாய்!

முத்துப் பற்கள் என்ற தலைப்பில் சிறிய பாடல் ஒன்று எழுதப்பட்டிருக்கிறது. எட்டு வரிகளைக் கொண்ட இந்தப் பாடல் பற்களை பாதுக்காக்க வேண்டும் என்ற தொனியில் எழுதப்பட்டுள்ளது.

கண்ட கண்ட பொருளை பல்லால்
கடிக்கும் பழக்கம் தவிர்திடுவோம்
உண்ட பின்னே உறங்கும் முன்னே
ஒழுங்காய் பல்லைத் துலக்கிடுவோம்

வெட்டும் பற்கள் வேட்டைப் பற்கள்
வேண்டும் நமக்கு நாளுமே
முத்துப் பற்கள் நன்றாய் காத்து
மகிழ்ச்சி காண்போம் வாழ்விலே!

மாலைக்காட்சி, அணில் குஞ்சு, மரம் நடுவோம், பச்சைக்கிளி என்ற தலைப்புக்களிலும் அழகிய கவிதைகள் இடம்பெற்றிருக்கின்றன. சிறுவர்களின் வாசிப்பு ஆர்வத்தைத் தூண்டும் வகையில் இவ்வாறான பல நூல்கள் வெளிவந்து கொண்டிருக்கின்றன. அந்த வகையில் வெளிமடை ரபீக் அவர்களின் பூஞ்சிறகுகுள் என்ற நூலும் தனக்கான தனியிடத்தைப் பெற்று நிற்கின்றது.

குழந்தைகளுக்கு எது நல்லது என்பதை பெற்றோரும், வளர்ந்தவர்களும் நன்கறிவார்கள். இன்றைய இளஞ் சமூகம தனது ஓய்வு நேரங்களை தொழில்நுட்ப வளர்ச்சிக் கருவிகளுடன் கழிக்கின்றது. ஆனால் அதன் பாரதூரங்களை அவர்கள் அறியமாட்டார்கள். நாம்தான் சிறுவர்களுக்கு உகந்தவற்றை கற்றுக்கொடுக்க வேண்டும். அந்த வகையில் நூல்கள் அறிவுக்குத் தீனியாகவும், நல்ல விடங்களைக் கற்றுக்கொடுக்கும் ஆசானாகவும் திகழ்கின்றன. எனவே பெற்றோர்களே உங்கள் பிள்ளைகள் எதிர்காலத்தில் சிறந்தவர்களாக மிளிர வேண்டுமானால் புத்தகங்கள் வாசிக்கும் பழக்கத்தை கற்றக்கொடுங்கள். நூலாசரியருக்கு எமது வாழ்த்துக்கள்!!

நூலின் பெயர் - பூஞ்சிறகுகள் (சிறுவர் பாடல்)
நூலாசிரியர் - வெளிமடை ரபீக்
தொலைபேசி - 077 9790053
வெளியீடு - வெள்ளாப்பு வெளி
விலை - 150 ரூபாய்